0774500010
“Yeni il”də evi necə bəzəməli?
Amma bu il dünyada pandemiyanın yayıldığını, həmçinin bir çox ölkələrdə bəzi qadağaların tətbiq edildiyini nəzərə alsaq,“Yeni il”i isti evimizdə ailəmiz və yaxın dostlarımızla keçirməyimiz daha məqsədəuyğun sayılar. Müxtəlif oyunlar oynayıb, səmimi söhbət edib 2021-ci ili xoş və gözəl arzularla qarşılamaq zövqverici olar. Bütün bunların fonunda müxtəlif aksesuarlardan istifadə edərək evinizi bayram əhval-ruhiyyəsində bəzəmək gününüzün daha əyləncəli keçməsinə şərait yaradacaq.
“Yeni il”in simvolu- Şam ağacı
Bir anda evin görünüşünü dəyişən, xüsusi rəng qatan Şam ağacı “Yeni il”in ən əsas atributlarından, olmazsa, olmazlarındandır. Hər evə, hər zövqə uyğun Şam ağacları var. Evinizin həcmini nəzərə alaraq kiçik, orta və ya böyük ölçülü Şam ağacı ala bilərsiniz. Bəziləri filmlərdə gördüyü kimi böyük Şam ağaclarını sevir. Digərlərinin seçimi isə masanın üzərinə qoyulacaq qədər kiçik Şam ağacları olur. İstəyə uyğun ölçüdə ağacı aldıqdan sonra, əsas məsələ onu bəzəməkdir. Açığı, Şam ağacını bəzəmək bir çoxları üçün artıq hobbiyə çevrilib desək, yanılmarıq. Xüsusi maraq və sevgi ilə bəzədilən hər bir Şam ağacı gözoxşayan görüntüyə sahib olur. Ağacı bəzəmək üçün ilk olaraq onun yaşıl budaqlarını qabartmaq lazımdır. Çünki əksər süni ağacların budaqları qutuda qaldığı üçün əzilmiş və dolaşmış şəkildə olur. Budaqları düzəltdikdən sonra, sıra ağacın işıqlandırılmağındadır. Bunun üçün xüsusi dekorativ işıqlardan istifadə edə bilərsiniz.
Ağacınızın daha cəlbedici və gözalıcı olmağı üçün budaqlarından oyuncaqlar asmağınız tövsiyə edilir. Ən yuxarı hissədə isə ağacın ölçüsünə uyğun ulduz yerləşdirilir. Ağacın bəzəmə işi yekunlaşdıqdan sonra zövqə görə üzərinə zər qoyula və qar spreyi vurula bilər. Bütün bəzəmə işləri boyunca diqqət etməli olduğunuz məqam isə rəng uyumudur. Yəni istifadə edilən aksesuarlar arasında rəng uyğunluğu gözlənilməlidir. “Yeni il”in rəngləri dedikdə isə qırmızı, ağ, yaşıl və qızılı rənglər nəzərdə tutulur. Bununla bərabər istəyə uyğun olaraq Şam ağacının altında hədiyyə bağlamaları yerləşdirə bilərsiniz.
Bəzək aksesuarlarından istifadə
Kiçik toxunuşlarla evinizdə bayram əhval ruhiyyəsi yara bilərsiniz. Bunun üçün müxtəlif formalı və rəngli aksesuarlar köməyinizə çatacaq. Evinizin “Yeni il” konsepsiyalı dizaynına elə giriş qapısından başlamağınız daha yaxşı olar. Məsələn, qonağınızın qapıdan içəri girdiyi an ona “Yeni il”i xatırladan xalça və qapıdan asılan dekorativ gül əla seçimdir. Daha sonra qonaq otağında istifadə edəcəyiniz dizayn elementləri sizin nə qədər zövqlü biri olduğunuzu göstərəcək.
Otağın divarlarından müxtəlif dillərdə “Xoş gəldin Yeni il”, eyni zamanda “2021-ci il” yazısı asa bilərsiniz. Bunu istəsəniz özünüz də rəngli kağızlarla yaza və ya hazır şəkildə ala bilərsiniz. Evinizin dizaynına rəng qatacaq digər element isə şarlardır. Müxtəlif rəngli şarları evinizin istənilən küncünə yerləşdirməyiniz mümkündür. Həmçinin fərqli dekorativ şamlardan da istifadə edilir. Bəzəmə işlərini rəngli zərlər və qar spreyi ilə tamamlamağınız məsləhət olunur. Bundan başqa evinizin müxtəlif yerlərində “Yeni il”in digər simvolu olan Şaxta Baba və Qarqız oyuncaqları qoymaq olar.
“Yeni il” süfrəsi
Qonaq otağını bayram üçün dizayn edərkən masa və stulları unutmaq olmaz. Menyumuzdakı yeməklər fərqli olsa da çalışmalıyıq ki, onları süfrəyə yaşıl məzələr və qırmızı rəngi andıran nar dənəcikləri ilə sərvis edək. Eynilə masaya rəng qatmaq üçün daha çox yaşıl və qırmızı tonlu aksesuarlardan istifadə etməyiniz tövsiyə olunur. Stullarınıza isə zər bağlayaraq daha gözoxşayan bir mənzərə yaratmış olarsınız.
Ümid edirik ki, yazımız “Yeni il” üçün evinizi dizayn etməkdə sizə yardım edəcək. Hər birinizə xeyirli, uğurlu illər arzu edirik, “Yeni il”iniz mübarək!